07 korrik 2009

Transferimi i Presidencës së UE-së nga Republika Çeke mbi Suedinë

Më 07 korrik, në Qendrën Informative të UE-së u mbajt konferenca për shtyp, e cila u fokusua në transferimin e Presidencës së UE-së nga Republika Çeke mbi Suedinë.

Ambasadori Suedez Lars FRÉDEN elaboroi prioritetet e gjashtë muajve të ardhshëm, gjatë kohës së presidencës suedeze.
“Gjashtë muajt e ardhshëm do të karakterizohen me ndryshime dhe ripërtrirje. Punën do të fillojë Parlamenti i sapo zgjedhur Europian dhe do të emërohet Komisioni i ri. Kushtet e bashkëpunimit do të ndryshojnë nëse Traktati i Lisbonës hyn në fuqi. Sfidat më të mëdha dhe më të rëndësishme janë ekonomia, punësimi dhe klima”, sqaroi Ambasadori Fréden.

Ai theksoi se procesi i vazhdueshëm i zgjerimit është me rëndësi strategjike, për të siguruar vend dhe progres në një Europë të hapur dhe të bashkuar.

Duke iu referuar procesit të zgjerimit , Përfaqësuesi Special dhe Shef i Delegacionit të Komisionit Europian në Shkup, Ambasadori Ervan FUERE theksoi se liberalizimi i vizave është një shembull i shkëlqyer për atë se çka mund të arrihet nëse ekziston vullneti politik për plotësimin e kritereve. Ai tha se përpjekjet për përmbushjen e kushteve të UE-së duhet të dyfishohen para shpalljes së Raportit të Progresit nga ana e Komisionit Europian, në vjeshtë.

Më tepër hollësira mbi prioritetet e presidencës suedeze mund të gjeni në këtë faqe:
http://www.se2009.eu/en/the_presidency/work_programme