03 Shtator 2009

Komisionari Jan FIGEL e hapi Bienalen e XIV për artistë të rinj nga Evropa dhe Mesdheu - Shtatë porta: Bienale 2009, Shkup
 

Më 3 shtator, Komisinonari për arsim, trajnim dhe kulturë Jan FIGEL, bëri një vizitë dyditore, duke marrë pjesë në hapjen e edicionit të edicionit të XIV-të të Bienales për artistë të rinj nga Evropa dhe Mesdheu - Shtatë porta (3-12 shtator), në sheshin kryesor të qytetit.

Gjatë dhjetë ditëve të Bienales, e cila është nën patronazhin e Komisionarit FIGEL, në Shkup do të mblidhen më shumë se 700 artistë nga 46 shtete dhe krijimet e tyre do të shfaqen në vende publike të qytetit, të cilat do të bëhen vendtakime për dialog ndërkulturor. “Kam kënaqësinë që ky edicion i Bienales për artistë të rinj nga Evropa dhe Mesdheu mbahet në vitin 2009 - viti Evropian i kreativitetit dhe inovacionit. Kultura dhe arti janë mjetet më të mira për inkurajimin e dialogut konstruktiv dhe paqësor për tejkalimin e barrierave politike dhe kulturore”, theksoi FIGEL gjatë ceremonisë së hapjes. Bienalja u përkrah dhe mbështetet nga Agjencia ekzekutive për arsim, kulturë dhe audiovizualizim (EACEA), përgjegjëse për menaxhimin e programeve të ndryshme të BE-së në fushën e arsimit, kulturës dhe audiovizualizimit.

Ditën e njëjtë, Komisionari FIGEL mori pjesë në diskutimin me temë “Mundësitë e BE-së për studentët dhe të rinjtë nga Ballkani Perendimor”, në Qendrën informative të BE-së. Ai tha: “Komisioni Evropian mori masa për të siguruar më shumë bursa për studentët nga Ballkani Perendimor në kuadër të Programit Erasmus Mundus dhe një skemë më të gjërë të bursave për studentët e niveleve të ndryshme dhe stafit akademik”. Që nga viti 2004, rreth 1200 studentë ose studiues nga Ballkani Perendimor, përfituan nga dy skemat e mobilitetit të Programit Erasmus Mundus, duke përfshirë rreth 130 studentë dhe stafin akademik nga vendi. Ai inkurajoi studentët që ë përfitojnë maksimalisht nga mundësitë e shtuara të programit të BE-së për mobilitet, Erasmus Mundus.

Për më tepër, Komisionari FIGEL iu drejtua pjesëmarrësve në takimin e tretë jozyrtar të pikave për kontakt kulturor (4-5 shtator). Pikat për kontakt kulturor nga Austria, Bullgaria, Republika Çeke, Kroacia, Britania e Madhe, Finlanda, Franca, Lituania, Malta, Polonia, Portugalia, Rumania, Serbia, Sllovakia, Sllovenia, Spanja, Mali i Zi dhe nikoqiri i tyre – Pikat për kontakt kulturor nga ish Republika Jugosllave e Maqedonisë, u takuan në Qendrën informative të BE-së në Shkup. Tema e takimit ishte theksimi i sfidave të reja të pikave kulturore të kontaktit në implementimin e Programit kulturor 2007 – 2013. Pjesëmarrësve iu drejtua edhe Ministresha për kulturë, znj. Elizabeta Kançeska Milevska.

Si pjesë e vizitës së tij ishte edhe takimi i Komisionarit FIGEL me Kryeministrin Nikolla GRUEVSKI, Zëvendës kryeministrin për Integrime Evropiane, Vasko NAUMOVSKI, Ministrin e Arsimit Nikolla TODOROV si dhe me Ministreshën për Kulturë, Elizabeta Kançeska Milevska.